Вызвалены пасля пяцігадовага зняволення Сяргей Ціханоўскі адкрыў дабрачынны збор на меддапамогу. Яму неабходна 8 тысяч еўра.
«Мне няпроста прасіць пра дапамогу, але прыйшла і мая чарга. Сёння я звяртаюся да вас па падтрымку, як і дзясяткі іншых беларусаў, што перажылі рэпрэсіі. Мая жонка — лідарка дэмакратычных сіл, але гэта не значыць, што за маёй спінай неабмежаваныя рэсурсы, а мае праблемы са здароўем вырашаюцца аўтаматычна. Маё аднаўленне — выклік для мяне, як і для кожнага, хто прайшоў праз турму», — напісаў Ціханоўскі.
Экс-палітвязень нагадаў, што ў зняволенні яго трымалі ў адзіночнай камеры і без медыцынскай дапамогі. Ён адзначыў, што яго галоўная задача — аднавіцца, каб працягваць паўнавартасна жыць, працаваць і змагацца.
«Я хачу паправіць здароўе, вярнуць сваю сілу і працягваць быць карысным. Для сваёй сям'і, для Беларусі, для вас», — напісаў экс-палітвязень.
Ціханоўскі просіць ахвяраваць яму 8 тысяч еўра. Частка гэтай сумы пойдзе на стаматалогію — экс-палітвязень раней расказваў, што ў зняволенні ў яго выпалі зубы. Сродкі, якія застануцца, ён скіруе на поўнае медабследаванне, карэкцыю зроку, які сапсаваўся ў зняволенні.
