Прыватная гімназія, якую заснавала Ирына Абельская — меркаваная маці Мікалая Лукашэнкі, дала справаздачу пра фінансы за мінулы год. Паглядзелі, колькі структура зарабіла на паслугах і колькі атрымала грошай ад спонсараў, у тым ліку, імаверна, з бюджэту.
«Мінская міжнародная гімназія» працуе ў Драздах. Цяпер яна застаецца адной з нямногіх прыватных школ, у якой не забралі ліцэнзію.
На аказанні сваіх паслуг гімназія летась зарабіла 2,86 млн рублёў. Годам раней паступленні былі на ўзроўні 2,4 млн. Аднак чысты прыбытак (даходы за вылікам расходаў і падаткаў) скарацілася з 257 тыс. у 2023 годзе да 128 тыс. у мінулым, вынікае з фінансавай справаздачы, апублікаванай на сайце kartoteka.by.
Акрамя гэтага, летась кампанія атрымала больш за 1,7 млн рублёў у выглядзе «мэтавага фінансавання». З іх 200 тыс. — гэта спонсарская дапамога, а астатнія 1,5 млн — «іншыя паступленні». У публічнай справаздачы не ўдакладняецца, паступілі гэтыя грошы з бюджэту ці ад прыватных дабрачынцаў. Аднак мяркуючы з іншых звестак, гэтая прыватная ўстанова атрымлівае дзяржпадтрымку. Як паведамлялася раней, з 2020 да 2024 года школа на розныя закупкі выдаткавала як мінімум 500 тыс. рублёў з бюджэту.
Школа была заснаваная Ірынай Абельскай, аднак потым перайшла ў кіраванне кампаніі «Горизонты знаний» (яна ў сваю чаргу належыць кіпрскай Blatberg holdings). Гэтая фірма летась ад рэалізацыі тавараў і паслуг выручыла 278 тыс. рублёў. А чысты прыбытак склаў 16 тыс. Годам раней у яе была страта на 777 тыс. рублёў.
Што за гімназія
Нагадаем, «Мінская міжнародная гімназія» пачала працу ў 2020 годзе. Заснавала яе меркаваная маці Мікалая Лукашэнкі Ірына Абельская. Участак пад будаўніцтва перадалі кампаніі «СертусАвиа», звязанай з Міхаілам Гуцарыевым, інвестыцыі ў праект ацэньваліся ў 12 млн даляраў. Фармальна школа зарэгістраваная на афшорную кампанію з Кіпра — «Блатберг Холдынгс Лімітэд», а кіруе ёю «СертусАвиа».
Будынак гімназіі займае больш за 9 тысяч квадратных метраў, ён абсталяваны спартыўнымі пляцоўкамі і стадыёнам. Сярод вучняў, імаверна, былі Мікалай Лукашэнка і дочкі Дзмітрыя Лукашэнкі.
Кошт навучання там на наступны навучальны год — 1420 рублёў.
Хто такая Ірына Абельская
Са снежня 1995 года Абельская працавала доктаркай у службе аховы Лукашэнкі.
У 2003 годзе яна лічыцца супрацоўніцай Рэспубліканскай бальніцы Кіраўніцтва справамі палітыка (у народзе яе называлі лечкамісіяй). Паралельна з гэтым з чэрвеня 2006 года жанчына лічылася ў БелМАПА, а ў красавіку 2007-га ў паслужны спіс Абельскай дадаўся Мінскі кансультацыйна-дыягнастычны цэнтр. Наступныя сем гадоў яна працавала ў гэтых трох установах.
У 2014 годзе жанчына ўваходзіць у Вышэйшую атэстацыйную камісію, у студзені 2015-га лічыцца ў РНПЦ траўматалогіі і артапедыі. І да 2018 года Абельская сумяшчае ўсе свае актыўнасці. Потым уступае і ў Беларускае таварыства радыёлагаў.
У 2019-м яна засноўвае таварыства з абмежаванай адказнасцю «Горизонты знаний». Пад гэтай юрыдычнай асобай працуе прыватная гімназія. Таксама сёлета жанчына пачала працаваць у НДІ анкалогіі і медыцынскай радыялогіі імя Аляксандрава.
З 2021 да 2024 года спіс яе дзейнасці крыху змяняўся: Абельская сумяшчала занятасць у Рэспубліканскім клінічным медцэнтры Кіраўніцтва справамі Лукашэнкі (новая назва лечкамісіі), атэстацыйнай камісіі, таварыстве радыёлагаў і працу ў БелМАПА і БДМУ.
У сакавіку 2024 года меркаваная маці Мікалая Лукашэнкі стала яшчэ і сенатаркай.
Чытайце таксама
