Гадавая інфляцыя ў Беларусі гэтай восенню можа разагнацца да 9%. Пра гэта заявіў старшы навуковы супрацоўнік BEROC, эканаміст Анатоль Харытончык падчас брыфінгу пра сітуацыю ў эканоміцы.
У ліпені-жніўні гадавая інфляцыя чакаецца на ўзроўні 7,5−8%, восенню — 8−9%, калі «ўлады не ўзмоцняць цэнавы кантроль», прагназуе Анатоль Харытончык.
Нагадаем, у чэрвені інфляцыя ў Беларусі разагналася да 7,3% гадавых. Месяцам раней яна была на ўзроўні 7,1%. Пры гэтым цэны на прадукты ў чэрвені выраслі на 10,5%.
Анатоль Харытончык таксама адзначыў, што ў Беларусі запаволіўся рост рэальных заробкаў: сярод прычын гэтага — паскарэнне інфляцыі і скарачэнне крэдытавання. На гэтым фоне аслабеў спажывецкі попыт.
Нагадаем, утрымліваць інфляцыю ў межах адназначнай лічбы шмат у чым удаецца за кошт жорсткага цэнавага дзяржрэгулявання, якое ўвялі ў кастрычніку 2022-га. У красавіку гэтага года па ім увялі паслабленні. Пасля гэтага інфляцыя яшчэ больш разагналася. Раней эксперты адзначалі, што беларускія чыноўнікі пойдуць на паслабленне цэнавага рэгулявання для таго, каб палепшыць фінансавы стан прадпрыемстваў праз «назапашаныя цэнавыя выдаткі».
У красавіку 2024-га Аляксандр Лукашэнка заявіў, што не ведае, да чаго прывядзе дзяржрэгуляванне цэн, якое ўвялі ў кастрычніку 2022-га. «Але калі ўрад не праваліць, гэта будзе ўнікальная аперацыя ў рынкавай, так бы мовіць, эканоміцы», — сказаў палітык.
На 2025 год улады плануюць утрымліваць інфляцыю на ўзроўні да 5%.
Чытайце таксама
